Kokapena

Bailara honetako bost udalerrien artean itsas bazterrean kokatuta dagoen bakarra da, bere herri mugakideak Amoroto, Berriatua eta Lekeitio direlarik. Herrigunea, ordea, itsas labarretatik urrun dago, barrualdean eta muino baten gainean. Bertan kokatuta egon da beti, Erdi Aroan eraiki zenetik. Udalerri hau lau auzotan banatzen da: Iturreta, Leagi, Likona eta Zelaia. Batzuk itsas bazterrean eta besteak, aldiz, tontor batetan kokatuta, eta guztira 6,69 Km² ditu.

Jende gutxi bizi da Mendexan. Dena den, azken errolden arabera, azken urteotan handitu egin da zertxobait bertako biztanleen kopurua. Izan ere, hainbat lekeitiarrek, herrian aski etxerik ezean, bertan aurkitu dute bizilekua.
Aldapatsua izan arren, paseatzeko leku aparta dugu Mendexa. Bista apartak ditu: itsasoak eta mendiak bat egiten dute paraje honetan. Bertan dugu baita ere Lea Ibarreko hondartza bakarra, Karraspio.